Arooz is now on the App Store, for iPhone and iPad. Download →

All poetry

چاہتا جو بھی ہے وہ کہہ کے گزر جاتا ہے

Aalam Nizami (b. 1984)

چاہتا جو بھی ہے وہ کہہ کے گزر جاتا ہے

دل حساس اس احساس سے مر جاتا ہے

ذہن میں بات بزرگوں کی تبھی بیٹھتی ہے

جب جوانی کا نشہ سر سے اتر جاتا ہے

جب انا میری ضرورت کا گلا گھونٹتی ہے

رنگ خود داری کے چہرے کا نکھر جاتا ہے

ڈسنے لگتی ہے مری خانہ بدوشی مجھ کو

جب کوئی پنچھی کبھی شام کو گھر جاتا ہے

جھوٹی تعریف سے ہوتی ہے مسرت اس کو

آئنہ کوئی دکھا دے تو بپھر جاتا ہے

جرم کرتا ہے کوئی اور یہاں پر عالمؔ

اور الزام کسی اور کے سر جاتا ہے