حسین خواب دکھایا دکھا کے چھوڑ دیا

حسین خواب دکھایا دکھا کے چھوڑ دیا

کسی نے اپنا بنایا بنا کے چھوڑ دیا

جو اس کی یادوں کا دیپک کبھی ہوا روشن

تو آنسوؤں سے بجھایا بجھا کے چھوڑ دیا

کیا نہ اس نے مرے درد کو کبھی محسوس

ہمیشہ دل کو دکھایا دکھا کے چھوڑ دیا

بتاتا کیسے میں حساس کے معانی اسے

سو آئنے کو اٹھایا اٹھا کے چھوڑ دیا

میں حوصلہ نہ جٹا پایا اس کو چھونے کا

نقاب رخ سے ہٹایا ہٹا کے چھوڑ دیا

کہیں نہ اس کی برائی میں ہم ہوئے شامل

نظر سے جس کو گرایا گرا کے چھوڑ دیا

بہت سلیقے سے اس نے کیا نظر انداز

قریب اپنے بٹھایا بٹھا کے چھوڑ دیا

نہ ان سے رکھی کبھی روشنی کی امیدیں

دیوں کو ہم نے جلایا جلا کے چھوڑ دیا

hasin khwab dikhaya dikha ke chhor diya

kisi ne apna banaya bana ke chhor diya

jo us ki yadon ka dipak kabhi hua raushan

tu ansuon se bujhaya bujha ke chhor diya

kiya na us ne mire dard ko kabhi mahsus

hamesha dil ko dikhaya dikha ke chhor diya

batata kaise main hassas ke maani use

so aine ko uthaya utha ke chhor diya

main hausla na juta paya us ko chhune ka

naqab-e-rukh se hataya hata ke chhor diya

kahin na us ki burai mein ham hue shamil

nazar se jis ko giraya gira ke chhor diya

bahut saliqe se us ne kiya nazar andaz

qarib apne bithaya bitha ke chhor diya

na un se rakhi kabhi raushni ki ummiden

diyon ko ham ne jalaya jala ke chhor diya