فصل گل سے زر خزاں تک ہے

فصل گل سے زر خزاں تک ہے

عمر دونوں کے درمیاں تک ہے

فاصلے ہیں بہت کٹھن اس کے

رہگزر دل سے جو زباں تک ہے

ایک دن خال و خد ابھارے گی

جو حقیقت مرے گماں تک ہے

وقت کر دے گا آئنہ خود ہی

کون سا ہم سفر کہاں تک ہے

خوش گمانی ہے جو مرے اندر

وہ بھی شاید ترے بیاں تک ہے

کاش ہوتی دلوں کے بیچ منیرؔ

یہ رسائی جو آسماں تک ہے

fasl-e-gul se zar-e-khizan tak hai

umr donon ke darmiyan tak hai

fasle hain bahut kathin us ke

rahguzar dil se jo zaban tak hai

ek din khal-o-khad ubharegi

jo haqiqat mire guman tak hai

waqt kar dega aina khud hi

kaun sa ham safar kahan tak hai

khush gumani hai jo mire andar

wo bhi shayad tire bayan tak hai

kash hoti dilon ke bich munir

ye rasai jo asman tak hai