نیند اڑنے کا سبب اور چین کھونے کا جواز

نیند اڑنے کا سبب اور چین کھونے کا جواز

پوچھتے ہیں لوگ مجھ سے عشق ہونے کا جواز

لڑ رہا ہوں میں اکیلا کارزار ہستی میں

کر فراہم تو بھی ظالم اپنے ہونے کا جواز

ڈھونڈتے ہیں لوگ کیسے حرف تند و تیز سے

دوسروں کی روح میں کانٹے چبھونے کا جواز

یہ ضروری تو نہیں ہم بھی فراہم کر سکیں

بیٹھے بیٹھے اپنے دامن کو بھگونے کا جواز

ساحلوں پر عافیت معدوم ہو جانے کے بعد

اور کیا ہوگا بھلا کشتی ڈبونے کا جواز

ضبط کے بندھن کو جس نے توڑ ڈالا ہے منیرؔ

پوچھتا ہے دوسروں سے میرے رونے کا جواز

nind urne ka sabab aur chain khone ka jawaz

puchhte hain log mujh se ishq hone ka jawaz

lar raha hun main akela karzar-e-hasti mein

kar faraham tu bhi zalim apne hone ka jawaz

dhundte hain log kaise harf-e-tund-o-tez se

dusron ki ruh mein kante chubhone ka jawaz

ye zaruri to nahin ham bhi faraham kar saken

baithe baithe apne daman ko bhigone ka jawaz

sahilon par afiyat maadum ho jane ke baad

aur kya hoga bhala kashti dubone ka jawaz

zabt ke bandhan ko jis ne tor dala hai munir

puchhta hai dusron se mere rone ka jawaz