کلام اپنا تبھی تو اکثر سے مختلف ہے

کلام اپنا تبھی تو اکثر سے مختلف ہے

جو سوچتے ہیں وہ پیش منظر سے مختلف ہے

کہاں سے ہم اپنی گردشوں کا جواز ڈھونڈیں

ہمارا محور زمیں کے محور سے مختلف ہے

اسی لئے تو قبولیت کے ہیں در مقفل

دعا تمہاری مرے مقدر سے مختلف ہے

تبھی تو بیٹھے ہیں منظروں پر جمائے آنکھیں

جو ان کا ظاہر ہے ان کے اندر سے مختلف ہے

تراشتے ہیں جو آزران خیال اکثر

وہ ایک پیکر تمہارے پیکر سے مختلف ہے

منیرؔ دونوں ہیں نیل گوں وسعتوں کے حامل

مگر سمندر کا خواب امبر سے مختلف ہے

kalam apna tabhi to aksar se mukhtalif hai

jo sochte hain wo pesh manzar se mukhtalif hai

kahan se ham apni gardishon ka jawaz dhunden

hamara mehwar zamin ke mehwar se mukhtalif hai

isi liye to qubuliyat ke hain dar muqaffal

dua tumhari mire muqaddar se mukhtalif hai

tabhi to baithe hain manzaron par jamae ankhen

jo un ka zahir hai un ke andar se mukhtalif hai

tarashte hain jo azaran-e-khayal aksar

wo ek paikar tumhare paikar se mukhtalif hai

munir donon hain nil gun wusaton ke hamil

magar samundar ka khwab ambar se mukhtalif hai