دیکھ لیتے ہو محبت سے یہی کافی ہے

دیکھ لیتے ہو محبت سے یہی کافی ہے

دل دھڑکتا ہے سہولت سے یہی کافی ہے

مدتوں سے نہیں دیکھا ترا جلوہ لیکن

یاد آ جاتے ہو شدت سے یہی کافی ہے

جو بھی رستے میں گزرتا ہے مرے پہلو سے

دیکھتا ہے تری نسبت سے یہی کافی ہے

میرے آنگن میں اترتا نہیں وہ چاند کبھی

دیکھ لیتے ہیں اسے چھت سے یہی کافی ہے

ساری دنیا سے الجھتے ہیں مگر تیرا کہا

مان لیتے ہیں شرافت سے یہی کافی ہے

حال دنیا کے ستائے ہوئے کچھ لوگوں کا

پوچھ لیتے ہو شرارت سے یہی کافی ہے

کیا ہوا ہم کو میسر جو زر و مال نہیں

کٹ رہی ہے بڑی عزت سے یہی کافی ہے

آج کے عہد تغافل میں کسی در پہ منیرؔ

کوئی آ جائے ضرورت سے یہی کافی ہے

dekh lete ho mohabbat se yahi kafi hai

dil dharakta hai suhulat se yahi kafi hai

muddaton se nahin dekha tira jalwa lekin

yad a jate ho shiddat se yahi kafi hai

jo bhi raste mein guzarta hai mire pahlu se

dekhta hai tiri nisbat se yahi kafi hai

mere angan mein utarta nahin wo chand kabhi

dekh lete hain use chhat se yahi kafi hai

sari duniya se ulajhte hain magar tera kaha

man lete hain sharafat se yahi kafi hai

hal duniya ke satae hue kuchh logon ka

puchh lete ho shararat se yahi kafi hai

kya hua ham ko muyassar jo zar-o-mal nahin

kat rahi hai bari izzat se yahi kafi hai

aj ke ahd-e-taghaful mein kisi dar pe munir

koi a jae zarurat se yahi kafi hai