عمر بے وجہ نہ بے ربط گزاری جائے

عمر بے وجہ نہ بے ربط گزاری جائے

آئنہ دیکھ کے تصویر اتاری جائے

وہی کمرہ وہی خوشبو وہی ہر شب کی گھٹن

آج کی رات کہیں اور گزاری جائے

یوں ضرورت کی دکاں سے ہے تعلق اس کا

جیسے چوراہے پہ ہر روز بھکاری جائے

خوف آنکھوں کے کٹوروں سے چھلک جائے گا

مشت بھر خاک سہی چہرے پہ ماری جائے

ہے کھنڈر جسم مگر روح کی تسکیں کے لیے

بوڑھی دیوار کسی طرح سنواری جائے

شام ہی سے مرے بستر کی شکن کہتی ہے

آج بھی کل کی طرح رات نہ بھاری جائے

اپنے تکیے پہ لکھا اس نے یہ مصرع عاجزؔ

آنکھ لگ جائے تو پھر چیخ نہ ماری جائے

umr be wajh na be rabt guzari jae

aina dekh ke taswir utari jae

wahi kamra wahi khushbu wahi har shab ki ghutan

aj ki rat kahin aur guzari jae

yun zarurat ki dukan se hai taalluq us ka

jaise chaurahe pe har roz bhikari jae

khauf ankhon ke katoron se chhalak jaega

musht bhar khak sahi chehre pe mari jae

hai khandar jism magar ruh ki taskin ke liye

burhi diwar kisi tarah sanwari jae

sham hi se mire bistar ki shikan kahti hai

aj bhi kal ki tarah rat na bhari jae

apne takiye pe likha us ne ye misra ajiz

ankh lag jae to phir chikh na mari jae