Arooz is now on the App Store, for iPhone and iPad. Download →

All poetry

ہجر کا سوگ منانا کبھی دریا رونا

Aadil Rahi (b. 1993)

ہجر کا سوگ منانا کبھی دریا رونا

یاد کر کے تجھے ہنسنا کبھی رونا رونا

کیا بتاؤں اسے کس بات پہ ہنستے دیکھا

کیا بتاؤں مجھے کس بات پہ آیا رونا

کیسے بھولوں گا وہ بے باک ادائیں اس کی

اس کی باتیں تو وہ ہنسنا وہ لپٹنا رونا

بات اوروں کی نہیں تو تو مرا اپنا تھا

کاش تجھ کو نظر آتا مرے دل کا رونا

کوئی تو بات اسے اتنا رلاتی ہوگی

اچھا لگتا ہے کسے ٹوٹ کے تنہا رونا

تم تو خوش تھے نہ مجھے چھوڑ کے جاتے جاتے

وقت رخصت تمہیں کس بات پہ آیا رونا

مدتوں بعد یہ احساس ہوا ہے راہیؔ

مدتوں بعد پھر آیا مجھے اتنا رونا