ہر ملاقات میں لگتے ہیں وہ بیگانے سے

ہر ملاقات میں لگتے ہیں وہ بیگانے سے

فائدہ کیا ہے بھلا ایسوں کے یارانے سے

کچھ جو سمجھا تو مجھے سب نے ہی عاشق سمجھا

بات یہ خوب نکالی مرے افسانے سے

زندگی اپنی نظر آنے لگی صرف سراب

کبھی گزرے جو دل زار کے ویرانے سے

ایک پل بھی نہ ٹھہر پاؤ گے اے سنگ زنو

کوئی پتھر کبھی لوٹ آیا جو دیوانے سے

تم کو مرنا ہے تو مرنا مرے گل ہونے پر

شمع کہتی رہی شب بھر یہی پروانے سے

پھر نہ دیکھا تجھے اے جوشؔ سکوں سے بیٹھا

جب سے اٹھا ہے تو اس شوخ کے کاشانے سے

har mulaqat mein lagte hain wo begane se

faida kya hai bhala aison ke yarane se

kuchh jo samjha to mujhe sab ne hi ashiq samjha

bat ye khub nikali mire afsane se

zindagi apni nazar ane lagi sirf-e-sarab

kabhi guzre jo dil-e-zar ke wirane se

ek pal bhi na thahar paoge ai sang zano

koi patthar kabhi laut aya jo diwane se

tum ko marna hai to marna mire gul hone par

shama kahti rahi shab bhar yahi parwane se

phir na dekha tujhe ai josh-e-sukun se baitha

jab se utha hai to us shokh ke kashane se