مجھے جو دور سے لگتا تھا آب کا دریا

مجھے جو دور سے لگتا تھا آب کا دریا

گیا قریب تو پایا سراب کا دریا

کبھی ثواب کے ساحل سے لگ نہیں سکتی

وہ ناؤ جس کے لئے ہے عذاب کا دریا

بظاہر آب رواں کا جو اک خزانہ ہے

حقیقتاً ہے وہ دریا حباب کا دریا

مطالعہ کی جو وادی سے ہو کے بہتا ہے

وہ ہے مری نگہ انتخاب کا دریا

پرند فکر کی پرواز جب ہوئی ہے بلند

فلک سے عرش پہ اترا سحاب کا دریا

حقیقتوں کے جو ساحل کو چھوڑ کر بھٹکے

ملا ہے ان کو تصور میں خواب کا دریا

سراب دشت میں پیاسوں کے واسطے نادمؔ

بہا دیا ہے سخاوت کے آب کا دریا

mujhe jo dur se lagta tha ab ka dariya

gaya qarib to paya sarab ka dariya

kabhi sawab ke sahil se lag nahin sakti

wo nao jis ke liye hai azab ka dariya

bazahir ab-e-rawan ka jo ik khazana hai

haqiqatan hai wo dariya habab ka dariya

mutalaa ki jo wadi se ho ke bahta hai

wo hai miri nigah-e-intikhab ka dariya

parind fikr ki parwaz jab hui hai buland

falak se arsh pe utra sahab ka dariya

haqiqaton ke jo sahil ko chhor kar bhatke

mila hai un ko tasawwur mein khwab ka dariya

sarab-e-dasht mein pyason ke waste nadim

baha diya hai sakhawat ke ab ka dariya