گزرے جو اپنے یاروں کی صحبت میں چار دن

گزرے جو اپنے یاروں کی صحبت میں چار دن

ایسا لگا بسر ہوئے جنت میں چار دن

عمر خضر کی اس کو تمنا کبھی نہ ہو

انسان جی سکے جو محبت میں چار دن

جب تک جیے نبھائیں گے ہم ان سے دوستی

اپنے رہے جو دوست مصیبت میں چار دن

اے جان آرزو وہ قیامت سے کم نہ تھے

کاٹے ترے بغیر جو غربت میں چار دن

پھر عمر بھر کبھی نہ سکوں پا سکا یہ دل

کٹنے تھے جو بھی کٹ گئے راحت میں چار دن

جو فقر میں سرور ہے شاہی میں وہ کہاں

ہم بھی رہے ہیں نشۂ دولت میں چار دن

اس آگ نے جلا کے یہ دل راکھ کر دیا

اٹھتے تھے جوشؔ شعلے جو وحشت میں چار دن

guzre jo apne yaron ki sohbat mein char din

aisa laga basar hue jannat mein char din

umr-e-khizar ki us ko tamanna kabhi na ho

insan ji sake jo mohabbat mein char din

jab tak jiye nibhaenge ham un se dosti

apne rahe jo dost musibat mein char din

ai jan-e-arzu wo qayamat se kam na the

kate tire baghair jo ghurbat mein char din

phir umr bhar kabhi na sakun pa saka ye dil

katne the jo bhi kat gae rahat mein char din

jo faqr mein surur hai shahi mein wo kahan

ham bhi rahe hain nasha-e-daulat mein char din

is ag ne jala ke ye dil rakh kar diya

uthte the josh-e-shole jo wahshat mein char din