چمن میں کون ببولوں کی ڈال کھینچتا ہے

چمن میں کون ببولوں کی ڈال کھینچتا ہے

یہاں جو آتا ہے پھولوں کے گال کھینچتا ہے

وہ تیر بعد میں پہلے سوال کھینچتا ہے

سوال بھی جو سماعت کی کھال کھینچتا ہے

اے پیار بانٹنے والے میں خوب جانتا ہوں

کہ کتنی دیر میں مچھوارا جال کھینچتا ہے

نکل بھی سکتا ہوں قید تخیلات سے گر

وہ شخص کھینچ لے جس کا خیال کھینچتا ہے

میں اس کے آگے نہیں کھینچتا نیام سے تیغ

وہ شیرشاہ جو دشمن کی ڈھال کھینچتا ہے

یہ سرد صبح میں سویا شرارتی سورج

بس آنکھ کھلتے ہی پریوں کی شال کھینچتا ہے

میں ہوش مند ہوں خود بھی سو میری غزلوں میں

نہ رقص کرتا ہے عاشق نہ بال کھینچتا ہے

chaman mein kaun babulon ki dal khinchta hai

yahan jo ata hai phulon ke gal khinchta hai

wo tir baad mein pahle sawal khinchta hai

sawal bhi jo samaat ki khal khinchta hai

ai pyar bantne wale mein khub janta hun

ke kitni der mein machhwara jal khinchta hai

nikal bhi sakta hun qaid-e-takhayyulat se gar

wo shakhs khinch le jis ka khayal khinchta hai

main is ke age nahin khinchta niyam se tegh

wo shershah jo dushman ki dhal khinchta hai

ye sard subh mein soya shararati suraj

bas ankh khulte hi pariyon ki shal khinchta hai

main hosh mand hun khud bhi so meri ghazlon mein

na raqs karta hai ashiq na bal khinchta hai