کبھی جو شب کی سیاہی سے ناگہاں گزرے

کبھی جو شب کی سیاہی سے ناگہاں گزرے

ہم اہل ظرف ہر اک سوچ پر گراں گزرے

نگاہ و دل سے مٹا دیں جو تشنگی کا عذاب

وہ آبشار کے دھارے ابھی کہاں گزرے

غم آفریں تھا مسلسل سکوت شہر حبیب

ہم اس گلی سے مگر پھر بھی شادماں گزرے

شکستگی کی طلسمی فضا نئی تو نہیں

یہاں تو ایسے کئی دور امتحاں گزرے

نظر میں شوخ شبیہیں لیے ہوئے ہے سحر

ابھی نہ کوئی ادھر سے دھواں دھواں گزرے

تمام کوہ کشاکش تھا میرے سر پہ خیالؔ

اگرچہ اور بھی دنیا میں سخت جاں گزرے

kabhi jo shab ki siyahi se nagahan guzre

ham ahl zarf har ik soch par giran guzre

nigah-o-dil se mita den jo tishnagi ka azab

wo abshar ke dhare abhi kahan guzre

gham afrin tha musalsal sukut-e-shahr-e-habib

ham us gali se magar phir bhi shadman guzre

shikastagi ki tilismi faza nai to nahin

yahan to aise kai dur imtihan guzre

nazar mein shokh shabihen liye hue hai sahar

abhi na koi idhar se dhuan dhuan guzre

tamam koh kashakash tha mere sar pe khayal

agarche aur bhi duniya mein sakht jan guzre