سرد سناٹوں کی سب سرگوشیاں لے جاؤں گا

سرد سناٹوں کی سب سرگوشیاں لے جاؤں گا

میں جہاں بھی جاؤں گا دل کی زباں لے جاؤں گا

شہر چھوڑوں گا تو روئیں گی ملوں کی چمنیاں

دیکھنا اک روز میں سارا دھواں لے جاؤں گا

وہ جہاں چاہے چلا جائے یہ اس کا اختیار

سوچنا یہ ہے کہ میں خود کو کہاں لے جاؤں گا

سطح دریا رقص میں ہے آج مجھ کو دیکھ کر

آج میں اس پار اپنا کارواں لے جاؤں گا

وہ اگر دو چار قطروں سے نوازے گا تو کیا

ایک اک قطرے میں بحر بیکراں لے جاؤں گا

منظروں کو کیا خبر ہوگی کہ ان کے واسطے

قربتیں تقسیم کر کے دوریاں لے جاؤں گا

جن اندھیروں سے تمہیں ہر وقت وحشت ہے خیال

ان اندھیروں تک تمہاری داستاں لے جاؤں گا

sard sannaton ki sab sargoshiyan le jaunga

main jahan bhi jaunga dil ki zaban le jaunga

shahr chhorunga to roengi milon ki chimniyan

dekhna ik roz mein sara dhuan le jaunga

wo jahan chahe chala jae ye us ka ikhtiyar

sochna ye hai ke main khud ko kahan le jaunga

sath-e-dariya raqs mein hai aj mujh ko dekh kar

aj main us par apna karwan le jaunga

wo agar do char qatron se nawazega to kya

ek ik qatre mein bahr-e-bekaran le jaunga

manzaron ko kya khabar hogi ke un ke waste

qurbaten taqsim kar ke duriyan le jaunga

jin andheron se tumhen har waqt wahshat hai khayal

in andheron tak tumhari dastan le jaunga