چلچلاتی دھوپ سر پر اور تنہا آدمی

چلچلاتی دھوپ سر پر اور تنہا آدمی

آہ یہ خاموش پتھر اور تنہا آدمی

جس طرح اک برف کے ٹیلے پہ جلتی ہو چتا

یہ پگھلتا موم سا گھر اور تنہا آدمی

اس حصار خامشی میں برسر پیکار ہیں

تیز آوازوں کے لشکر اور تنہا آدمی

کیا اسی کا نام ہے رعنائیٔ بزم حیات

تنگ کمرہ سرد بستر اور تنہا آدمی

کس طرح آباد ہوگی دل کی سونی کائنات

ڈوبتے مجروح منظر اور تنہا آدمی

ہائے ان بیکار ذہنوں کی گھنی پرچھائیاں

اف یہ سناٹے کا اجگر اور تنہا آدمی

رات کے ننگے بدن سے خواہشوں کی چھیڑ چھاڑ

ہر گھڑی انجام کا ڈر اور تنہا آدمی

chilchilati dhup sar par aur tanha admi

ah ye khamosh patthar aur tanha admi

jis tarah ik barf ke tele pe jalti ho chita

ye pighalta mom sa ghar aur tanha admi

is hisar-e-khamushi mein barsar-e-paikar hain

tez awazon ke lashkar aur tanha admi

kya usi ka nam hai raanai-e-bazm-e-hayat

tang kamra sard bistar aur tanha admi

kis tarah abad hogi dil ki suni kainat

dubte majruh manzar aur tanha admi

hae un bekar zehnon ki ghani parchhaiyan

uf ye sannate ka ajgar aur tanha admi

rat ke nange badan se khwahishon ki chher chhar

har ghari anjam ka dar aur tanha admi