میں جہاں جاؤں مرے ساتھ چلے سناٹا

میں جہاں جاؤں مرے ساتھ چلے سناٹا

میری آنکھوں میں لگاتار جلے سناٹا

صبح آتی ہے دبے پاؤں چلی جاتی ہے

گھیر لیتا ہے مجھے شام ڈھلے سناٹا

بھاگتی بھیڑ کے قدموں سے لپٹ کر روئے

ورنہ ہر سست مسافر کو چھلے سناٹا

تم خیالات کے خیموں میں سمٹ مت جانا

جب سر راہ کبھی ہاتھ ملے سناٹا

پھر مرے شہر میں لوٹ آئی ہے دہشت گردی

پھر ہر اک جسم کے سائے میں پلے سناٹا

اب مکانوں کی چھتوں کا بھی نظارہ کر لو

گنگناتا ہے ستاروں کے تلے سناٹا

آج کل ان کے ٹھکانوں میں بڑی ہلچل ہے

کاش میرے بھی شبستاں سے ٹلے سناٹا

main jahan jaun mire sath chale sannata

meri ankhon mein lagatar jale sannata

subh ati hai dabe paon chali jati hai

gher leta hai mujhe sham dhale sannata

bhagti bhir ke qadmon se lipat kar roe

warna har sust musafir ko chhile sannata

tum khayalat ke khemon mein simat mat jana

jab sar-e-rah kabhi hath mile sannata

phir mire shahr mein laut ai hai dahshat gardi

phir har ik jism ke sae mein pale sannata

ab makanon ki chhaton ka bhi nazara kar lo

gungunata hai sitaron ke tale sannata

aj kal un ke thikanon mein bari halchal hai

kash mere bhi shabistan se tale sannata