گھڑی بھر خلوتوں کو آنچ دے کر بجھ گیا سورج

گھڑی بھر خلوتوں کو آنچ دے کر بجھ گیا سورج

کسی کے درد کی لے پر کہاں تک ناچتا سورج

نگاہوں میں نئے انداز سے پھر روشنی ہوگی

جب اگ آئے گا ذہنوں میں ہمارے اک نیا سورج

زمیں کا کرب اوج آسماں پر بھی جھلک اٹھا

نشیب کوہ پر جرأت سے جب جب آ ملا سورج

ہمارے گھر کے آنگن میں ستارے بجھ گئے لاکھوں

ہماری خواب گاہوں میں نہ چمکا صبح کا سورج

شبستاں در شبستاں ظلمتوں کی ایک یورش ہے

ہر اک دامن سے لپٹا ہے لرزتا ہانپتا سورج

ہمارے بام در سے آج بھی لپٹی ہے تاریکی

ہمارے آسمانوں میں بتاؤ کب اگا سورج

سنا دی داستاں اپنی جو ہم نے بے زباں ہو کر

مثال قطرہ شبنم بکھر کر رو پڑا سورج

ghari bhar khalwaton ko anch de kar bujh gaya suraj

kisi ke dard ki le par kahan tak nachta suraj

nigahon mein nae andaz se phir raushni hogi

jab ug aega zehnon mein hamare ik naya suraj

zamin ka karb-e-auj-e-asman par bhi jhalak utha

nasheb-e-koh par jurat se jab jab a mila suraj

hamare ghar ke angan mein sitare bujh gae lakhon

hamari khwab gahon mein na chamka subh ka suraj

shabistan dar shabistan zulmaton ki ek yurish hai

har ik daman se lipta hai larazta hanpta suraj

hamare bam dar se aj bhi lipti hai tariki

hamare asmanon mein batao kab uga suraj

suna di dastan apni jo ham ne be zaban ho kar

misal-e-qatra shabnam bikhar kar ro para suraj