صرف اک حد نظر کو آسماں سمجھا تھا میں

صرف اک حد نظر کو آسماں سمجھا تھا میں

آسمانوں کی حقیقت کو کہاں سمجھا تھا میں

خود ملا اور مل کے وہ اپنا پتہ بھی دے گیا

جبکہ ساری کاوشوں کو رائیگاں سمجھا تھا میں

زندگی کا رنگ پہچانا گیا جینے کے بعد

دور سے اس رنگ کو اڑتا دھواں سمجھا تھا میں

مہربانوں سے ہمیشہ ہی رہے شکوے گلے

اور ہر نا مہرباں کو مہرباں سمجھا تھا میں

دے رہا تھا وہ صدائیں اور میں خاموش تھا

کشمکش کی اس گھڑی کو امتحاں سمجھا تھا میں

ہو گیا ہوں قتل بے رحمی سے ان کے سامنے

حیف جن لوگوں کو اپنا پاسباں سمجھا تھا میں

پاس سے دیکھا تو جانا کس قدر مغموم ہیں

ان گنت چہرے کہ جن کو شادماں سمجھا تھا میں

sirf ik had-e-nazar ko asman samjha tha main

asmanon ki haqiqat ko kahan samjha tha main

khud mila aur mil ke wo apna pata bhi de gaya

jabke sari kawishon ko raigan samjha tha main

zindagi ka rang pahchana gaya jine ke baad

dur se is rang ko urta dhuan samjha tha main

mehrbanon se hamesha hi rahe shikwe gale

aur har na mehrban ko mehrban samjha tha main

de raha tha wo sadaen aur main khamosh tha

kashmakash ki us ghari ko imtihan samjha tha main

ho gaya hun qatl-e-be rahmi se un ke samne

haif jin logon ko apna pasban samjha tha main

pas se dekha to jana kis qadar maghmum hain

an ginat chehre ke jin ko shadman samjha tha main