Arooz is now on the App Store, for iPhone and iPad. Download →

All poetry

یہ مکرر اور یہ ارشاد زندہ باد

Chandra Shekhar Varma (b. 1967)

یہ مکرر اور یہ ارشاد زندہ باد

شعر کو سمجھے بنا دی داد زندہ باد

قیس رانجھا رومیو فرہاد زندہ باد

عشق میں جو بھی ہوا برباد زندہ باد

دل کو میرے کر رہی آباد زندہ باد

تو ہے زندہ باد تیری یاد زندہ باد

ایک تنکے نے بچا لی ڈوبتے کی جان

ہے بہت چھوٹی تو کیا امداد زندہ باد

ہے قفس اس جسم کا مانا بہت مضبوط

پھر بھی طائر روح کا آزاد زندہ باد

بھیڑ کا حصہ ہو تم تو بھیڑ کے ہی ساتھ

زور سے بولو ہمارے بعد زندہ باد

بخش دی جائیں ہمارے قاتلوں کی جان

آخری مقتول کی فریاد زندہ باد

دیکھیے بدلے ہیں کیسے باغ کے حالات

بلبلیں بھی کہتی ہیں صیاد زندہ باد

یوں تو بالکل رائیگاں تھی آپ کی تقریر

پر اسی تقریر کی روداد زندہ باد