ترے گواہ نے کیسا بیان رکھا ہے

ترے گواہ نے کیسا بیان رکھا ہے

کہا ہے جھوٹ مگر سچ کا دھیان رکھا ہے

پتہ لگاؤ کہ وہ خود کو کیا سمجھتا ہے

جہان بھر نے خدا جس کو مان رکھا ہے

نہ جانے کب کسی کے واسطے دھڑکنا ہو

سو دل نے خود کو ابھی تک جوان رکھا ہے

زباں پہ آتی ہوئی دل کی بات سے ڈر کر

کسی نے منہ میں اچانک سے پان رکھا ہے

خدا کے پاس اضافی تھا فاصلہ جتنا

وہ اس نے تیرے مرے درمیان رکھا ہے

جو کاٹتا ہے اسے دی زبان لمبی سی

جو کٹ رہا ہے اسے بے زبان رکھا ہے

سنو گے بات تو تم سب کی دھیان سے شیکھرؔ

کرو گے تم وہی جو تم نے ٹھان رکھا ہے

tire gawah ne kaisa bayan rakha hai

kaha hai jhut magar sach ka dhyan rakha hai

pata lagao ke wo khud ko kya samajhta hai

jahan bhar ne khuda jis ko man rakha hai

na jane kab kisi ke waste dharakna ho

so dil ne khud ko abhi tak jawan rakha hai

zaban pe ati hui dil ki bat se dar kar

kisi ne munh mein achanak se pan rakha hai

khuda ke pas izafi tha fasla jitna

wo us ne tere mire darmiyan rakha hai

jo katta hai use di zaban lambi si

jo kat raha hai use be zaban rakha hai

sunoge bat to tum sab ki dhyan se shekhar

karoge tum wahi jo tum ne than rakha hai