راہ جس نے چلی غافلوں کی طرح

راہ جس نے چلی غافلوں کی طرح

قتل بھی وہ ہوا بزدلوں کی طرح

تیری یادیں تصور کو جب مل گئیں

میری خلوت سجی محفلوں کی طرح

ڈھونڈتے ہیں سرابوں میں کیا تشنہ لب

دشت ہوتا نہیں ساحلوں کی طرح

موم بن کر وہ ہرگز پگھلتے نہیں

سختیوں میں جو دل ہیں سلوں کی طرح

روغن اخلاص کا رنگ لانے لگا

میں نچوڑا گیا جب تلوں کی طرح

یہ ہے سچ تیری فرقت نے مہلت نہ دی

شب گزاری مگر واصلوں کی طرح

سر میں سودائے سر ہو اگر جان من

مشکلیں بھی نہیں مشکلوں کی طرح

کچھ جواب اہل دل کے سوالوں کا دیں

بات کرتے ہیں جو عاقلوں کی طرح

قربت ان کی فریب سفر دے گئی

دور سے جو لگیں منزلوں کی طرح

اک مقدس صحیفہ مری شاعری

جس کو پڑھتے ہو تم ناولوں کی طرح

میرے افکار نادمؔ تن آساں نہیں

یوں تو لگتا ہوں میں کاہلوں کی طرح

rah jis ne chali ghafilon ki tarah

qatl bhi wo hua buzdilon ki tarah

teri yaden tasawwur ko jab mil gain

meri khalwat saji mahfilon ki tarah

dhundte hain sarabon mein kya tishna lab

dasht hota nahin sahilon ki tarah

mom ban kar wo hargiz pighalte nahin

sakhtiyon mein jo dil hain silon ki tarah

roghan ikhlas ka rang lane laga

main nichora gaya jab tilon ki tarah

ye hai sach teri furqat ne mohlat na di

shab guzari magar wasilon ki tarah

sar mein sauda-e-sar ho agar jan-e-man

mushkilen bhi nahin mushkilon ki tarah

kuchh jawab-e-ahl-e-dil ke sawalon ka den

bat karte hain jo aqilon ki tarah

qurbat un ki fareb-e-safar de gai

dur se jo lagen manzilon ki tarah

ik muqaddas sahifa miri shayari

jis ko parhte ho tum nawilon ki tarah

mere afkar nadim tan asan nahin

yun to lagta hun main kahilon ki tarah