گزرے ہوئے وقتوں کا نشاں تھا تو کہاں تھا

گزرے ہوئے وقتوں کا نشاں تھا تو کہاں تھا

ہم سے جو نہاں ہے وہ عیاں تھا تو کہاں تھا

اس طرح لپٹتی ہے اداسی کہ یہ سوچیں

دو پل کی خوشی کا جو گماں تھا تو کہاں تھا

بستی کا تقاضہ ہے کہیں ہیں تو کہاں ہیں

مجنوں کا بیاباں میں مکاں تھا تو کہاں تھا

بیٹھا ہے مرے پاس کہ چلنا نہیں ممکن

صحبت کی حدوں کا جو نشاں تھا تو کہاں تھا

اب سوچتے ہیں بیٹھ کے گلشن کی فضا میں

صحرا میں ہمارا جو مکاں تھا تو کہاں تھا

پیری ہے بزرگی ہے بڑھاپا ہے کہ کیا ہے

اس کرب میں رہنا کہ جواں تھا تو کہاں تھا

نشہ ہی نہیں سب کا بھرم ٹوٹ رہا تھا

سنتے تھے کوئی پیر مغاں تھا تو کہاں تھا

عامرؔ کو ہمیں ڈھونڈ کے لائیں ہیں بہ مشکل

کہتے ہیں وہ پہلے سے یہاں تھا تو کہاں تھا

guzre hue waqton ka nishan tha to kahan tha

ham se jo nihan hai wo ayan tha to kahan tha

is tarah lipatti hai udasi ke ye sochen

do pal ki khushi ka jo guman tha to kahan tha

basti ka taqaza hai kahin hain to kahan hain

majnun ka bayaban mein makan tha to kahan tha

baitha hai mire pas ke chalna nahin mumkin

sohbat ki hadon ka jo nishan tha to kahan tha

ab sochte hain baith ke gulshan ki faza mein

sahra mein hamara jo makan tha to kahan tha

piri hai buzurgi hai burhapa hai ke kya hai

is karb mein rahna ke jawan tha to kahan tha

nasha hi nahin sab ka bharam tut raha tha

sunte the koi pir-e-mughan tha to kahan tha

amir ko hamen dhund ke laen hain ba mushkil

kahte hain wo pahle se yahan tha to kahan tha