ہم نے دیکھے عجب عجب گونگے

ہم نے دیکھے عجب عجب گونگے

تھی زباں تو مگر تھے سب گونگے

کر شکایت نہ بے زبانوں کی

نطق والے ہوئے ہیں جب گونگے

حشر برپا ہے بیچ دریا میں

دونوں ساحل ہیں لب بہ لب گونگے

یہ عنایت ہے عہد حاضر کی

سلسلہ ہائے روز و شب گونگے

بے ادب ہوں زباں دراز اگر

ہو ہی جاتے ہیں با ادب گونگے

زود گوئی میں جو ہوئے بدنام

بن کے بیٹھے ہوئے ہیں اب گونگے

ان کو پانی کوئی نہیں دیتا

جو بھی نادمؔ ہیں تشنہ لب گونگے

ham ne dekhe ajab ajab gunge

thi zaban to magar the sab gunge

kar shikayat na be zabanon ki

nutq wale hue hain jab gunge

hashr barpa hai bich dariya mein

donon sahil hain lab ba lab gunge

ye inayat hai ahd-e-hazir ki

silsila ha-e-roz-o-shab gunge

be adab hun zaban daraz agar

ho hi jate hain ba adab gunge

zud goi mein jo hue badnam

ban ke baithe hue hain ab gunge

un ko pani koi nahin deta

jo bhi nadim hain tishna lab gunge