ذہن اور دل میں جو رہتی ہے چبھن کھل جائے

ذہن اور دل میں جو رہتی ہے چبھن کھل جائے

آئے کاغذ پہ تو سلمائے سخن کھل جائے

قطرۂ‌ دیدۂ نمناک مسیحائی کرے

فکر کے بند دریچوں کی شکن کھل جائے

میں اسے روز مناتا ہوں سحر ہونے تک

میرے اللہ کسی شب تو یہ دلہن کھل جائے

ایک خوشبو سی ہے جو روح کی گہرائی میں

لفظ مل جائیں تو معنی کا چمن کھل جائے

اس طرح جاگے کسی روز غزل کا جادو

جیسے مستی میں پیا سے کوئی جوگن کھل جائے

نیم شب عجز و سماجت سے کروں دست دراز

لفظ دھونے کے لئے آنکھوں میں ساون کھل جائے

سرکشی اور تجاوز سے بچانا یا رب

میرے احساس میں گر یاس کا پھن کھل جائے

zehn aur dil mein jo rahti hai chubhan khul jae

ae kaghaz pe to salma-e-sukhan khul jae

qatra-e-dida-e-namnak masihai kare

fikr ke band darichon ki shikan khul jae

main use roz manata hun sahar hone tak

mere allah kisi shab to ye dulhan khul jae

ek khushbu si hai jo ruh ki gahrai mein

lafz mil jaen to maani ka chaman khul jae

is tarah jage kisi roz ghazal ka jadu

jaise masti mein piya se koi jogan khul jae

nim shab ijz-o-samajat se karun dast-e-daraz

lafz dhone ke liye ankhon mein sawan khul jae

sarkashi aur tajawuz se bachana ya rab

mere ehsas mein gar yas ka phan khul jae