دھانی سرمئی سبز گلابی جیسے ماں کا آنچل شام

دھانی سرمئی سبز گلابی جیسے ماں کا آنچل شام

کیسے کیسے رنگ دکھائے روز لبالب چھاگل شام

چرواہے کو گھر پہنچائے پہرے دار سے گھر چھڑوائے

آتے جاتے چھیڑتی جائے دروازے کی سانکل شام

سورج کے پاپوں کی گٹھری سر پر لادے تھکی تھکی سی

خاموشی سے منہ لٹکائے چل دیتی ہے پیدل شام

بے حس دنیا داروں کو ہو دنیا کی ہر چیز مبارک

غم زادوں کا سرمایا ہیں آنسو آہیں بوتل شام

سورج کے جاتے ہی اپنے رنگ پہ آ جاتی ہے دنیا

جانے بوجھے چپ رہتی ہے شب کے موڑ پہ کومل شام

سانسوں کی پر شور ڈگر پہ رقص کرے گا سناٹا

چپکے سے جس روز اچانک چھنکا دے گی پائل شام

بدرؔ تمہیں کیا حال سنائیں اتنا ہی بس کافی ہے

تنہائی میں کٹ جاتی ہے جیسے تیسے مخمل شام

dhani surmai sabz gulabi jaise man ka anchal sham

kaise kaise rang dikhae roz labalab chhagal sham

charwahe ko ghar pahunchae pahre dar se ghar chhurwae

ate jate chherti jae darwaze ki sankal sham

suraj ke papon ki gathri sar par lade thaki thaki si

khamoshi se munh latkae chal deti hai paidal sham

be his duniya daron ko ho duniya ki har chiz mubarak

gham zadon ka sarmaya hain ansu ahen botal sham

suraj ke jate hi apne rang pe a jati hai duniya

jane bujhe chup rahti hai shab ke mor pe komal sham

sanson ki pur shor dagar pe raqs karega sannata

chupke se jis roz achanak chhanka degi pail sham

badr tumhen kya hal sunaen itna hi bas kafi hai

tanhai mein kat jati hai jaise taise makhmal sham