کس کو فرصت کون پڑھے گا چہرے جیسا سچا سچ

کس کو فرصت کون پڑھے گا چہرے جیسا سچا سچ

روز عدالت میں چلتا ہے کھوٹا سکہ جھوٹا سچ

اونچے خوابوں کے تاجر سے کوئی نہیں یہ پوچھنے والا

کون جوانوں کے چہروں پر لکھ دیتا ہے پیلا سچ

ہم سے کیا پوچھو گے صاحب شہر کبھی کا ٹوٹ چکا

شام کی میلی چادر پر ہے ٹکڑے ٹکڑے پھیلا سچ

ان آنکھوں میں مستقبل کے خواب بھلا کیا اتریں گے

جن آنکھوں نے دیکھ لیا ہے وقت سے پہلے نیلا سچ

اس کے بیٹا بیٹی کالج اسی طرف سے جاتے ہیں

رات کو جس نے بیچ سڑک پر پھینکا ہے اک گیلا سچ

سب نے ہم کو خوشحالی کے خواب دکھا کر چھوڑ دیا

گلیوں گلیوں گھوم رہا ہے دھول میں لپٹا ننگا سچ

بدرؔ تمہاری راہ میں آ کر دنیا جال بچھائے گی

جو کہتے ہو کہتے رہنا چھوڑ نہ دینا لکھنا سچ

kis ko fursat kaun parhega chehre jaisa sachcha sach

roz adalat mein chalta hai khota sikka jhuta sach

unche khwabon ke tajir se koi nahin ye puchhne wala

kaun jawanon ke chehron par likh deta hai pila sach

ham se kya puchhoge sahab shahr kabhi ka tut chuka

sham ki maili chadar par hai tukre tukre phaila sach

in ankhon mein mustaqbil ke khwab bhala kya utrenge

jin ankhon ne dekh liya hai waqt se pahle nila sach

us ke beta beti kalij isi taraf se jate hain

rat ko jis ne bich sarak par phenka hai ik gila sach

sab ne ham ko khushhali ke khwab dikha kar chhor diya

galiyon galiyon ghum raha hai dhul mein lipta nanga sach

badr tumhari rah mein a kar duniya jal bichhaegi

jo kahte ho kahte rahna chhor na dena likhna sach