چراغوں میں اندھیرا ہے اندھیرے میں اجالے ہیں

چراغوں میں اندھیرا ہے اندھیرے میں اجالے ہیں

ہمارے شہر میں کالی ہوا نے پر نکالے ہیں

ہمیں شب کاٹنے کا فن وراثت میں ملا ہم نے

کبھی پتھر پکائے ہیں کبھی سپنے ابالے ہیں

دلوں میں خوف ہے اس کا نظر ہے اس کی رحمت پر

گناہ گاروں میں شامل ہیں مگر اللہ والے ہیں

لڑے تھے ساتھ مل کر ہم چراغوں کے لئے لیکن

ہمارے گھر اندھیرے ہیں تمہارے گھر اجالے ہیں

تمہاری یاد سے اچھا نہیں ہوتا کوئی عالم

میسر جن کو ہو جائے بڑی تقدیر والے ہیں

محبت آخری حل ہے ہمارے سب مسائل کا

مگر ہم نے تو نفرت کے سپنولے دل میں پالے ہیں

بھڑکتی آگ تو دو چار دن میں بجھ گئی تھی بدرؔ

ابھی تک شہر کے منظر نہ جانے کیوں دھوانلے ہیں

charaghon mein andhera hai andhere mein ujale hain

hamare shahr mein kali hawa ne par nikale hain

hamen shab katne ka fan wirasat mein mila ham ne

kabhi patthar pakae hain kabhi sapne ubale hain

dilon mein khauf hai us ka nazar hai us ki rahmat par

gunah garon mein shamil hain magar allah wale hain

lare the sath mil kar ham charaghon ke liye lekin

hamare ghar andhere hain tumhare ghar ujale hain

tumhari yad se achchha nahin hota koi alam

muyassar jin ko ho jae bari taqdir wale hain

mohabbat akhiri hal hai hamare sab masail ka

magar ham ne to nafrat ke sapnawale dil mein pale hain

bharakti ag to do char din mein bujh gai thi badr

abhi tak shahr ke manzar na jane kyun dhawanle hain