اقرار کسی دن ہے تو انکار کسی دن

اقرار کسی دن ہے تو انکار کسی دن

ہو جائے گی اب آپ سے تکرار کسی دن

چاہا کبھی سوچا کبھی تصویر بنائی

چھوڑا نہ تری یاد نے بے کار کسی دن

پلکوں پہ ستارے لیے راہوں میں کھڑے ہیں

فرصت ہو تو آ جائیے سرکار کسی دن

دنیا میں سدا چلتی ہے چاہت کی حکومت

آ جاؤ منا لیں گے ہم اتوار کسی دن

آیا ہے اکیلا تجھے جانا ہے اکیلا

بس دیکھتے رہ جائیں گے سب یار کسی دن

دولت کے یہ انبار ترا ساتھ نہ دیں گے

گر جائے گی نادان یہ دیوار کسی دن

اچھی نہیں لگتی ہمیں عادت یہ تری بدرؔ

ہر بار کبھی اور تو ہر بار کسی دن

iqrar kisi din hai to inkar kisi din

ho jaegi ab ap se takrar kisi din

chaha kabhi socha kabhi taswir banai

chhora na tiri yad ne be kar kisi din

palkon pe sitare liye rahon mein khare hain

fursat ho to a jaiye sarkar kisi din

duniya mein sada chalti hai chahat ki hukumat

a jao mana lenge ham itwar kisi din

aya hai akela tujhe jana hai akela

bas dekhte rah jaenge sab yar kisi din

daulat ke ye ambar tira sath na denge

gir jaegi nadan ye diwar kisi din

achchhi nahin lagti hamen adat ye tiri badr

har bar kabhi aur to har bar kisi din