کیا زمیں کیا آسماں کچھ بھی نہیں

کیا زمیں کیا آسماں کچھ بھی نہیں

ہم نہ ہوں تو یہ جہاں کچھ بھی نہیں

دیدہ و دل کی رفاقت کے بغیر

فصل گل ہو یا خزاں کچھ بھی نہیں

پتھروں میں ہم بھی پتھر ہو گئے

اب غم سود و زیاں کچھ بھی نہیں

کیا قیامت ہے کہ اپنے دیس میں

اعتبار جسم و جاں کچھ بھی نہیں

کیسے کیسے سر کشیدہ لوگ تھے

جن کا اب نام و نشاں کچھ بھی نہیں

ایک احساس محبت کے سوا

حاصل عمر رواں کچھ بھی نہیں

کوئی موضوع سخن ہی جب نہ ہو

صرف انداز بیاں کچھ بھی نہیں

kya zamin kya asman kuchh bhi nahin

ham na hun to ye jahan kuchh bhi nahin

dida-o-dil ki rifaqat ke baghair

fasl-e-gul ho ya khizan kuchh bhi nahin

pattharon mein ham bhi patthar ho gae

ab gham-e-sud-o-ziyan kuchh bhi nahin

kya qayamat hai ke apne des mein

etibar-e-jism-o-jan kuchh bhi nahin

kaise kaise sar kashida log the

jin ka ab nam-o-nishan kuchh bhi nahin

ek ehsas-e-mohabbat ke siwa

hasil-e-umr-e-rawan kuchh bhi nahin

koi mauzu-e-sukhan hi jab na ho

sirf andaz-e-bayan kuchh bhi nahin