مشکلوں میں پڑ گئے اپنا خدا کہہ کر تجھے

مشکلوں میں پڑ گئے اپنا خدا کہہ کر تجھے

تو ہی کہہ دے ہم پکاریں اور کیا کہہ کر تجھے

حال دل کہنے کی کیا اب بھی ضرورت رہ گئی

جب پکارا ہم نے اپنا دل ربا کہہ کر تجھے

جادۂ منزل پہ کھا کر ٹھوکریں ہوش آ گیا

کس قدر خوش تھے ہم اپنا رہنما کہہ کر تجھے

تیرے ہوتے تیری دنیا میں یہ بیداد و ستم

لوگ پچھتانے لگے اپنا خدا کہہ کر تجھے

اک زمانہ ہم سے غصہ ہے یہ ہم نے کیا کیا

سب کو چھوٹا کر دیا سب سے بڑا کہہ کر تجھے

ساری دنیا سے عداوت مول لے لی مفت میں

ہم نے اپنا دوست اپنا ہم نوا کہہ کر تجھے

آہ یہ اپنا سفینہ اور گرداب بلا

سخت شرمندہ ہوئے ہم ناخدا کہہ کر تجھے

کس طرح یہ ہم وفاداروں سے دیکھا جائے گا

لوگ محفل میں پکاریں بے وفا کہہ کر تجھے

اور بھی ان کی نگاہوں میں مہذب ہو گیا

کیا ملا سرشارؔ دل کا ماجرا کہہ کر تجھے

mushkilon mein par gae apna khuda kah kar tujhe

tu hi kah de ham pukaren aur kiya kah kar tujhe

hal-e-dil kahne ki kya ab bhi zarurat rah gai

jab pukara ham ne apna dil ruba kah kar tujhe

jada-e-manzil pe kha kar thokaren hosh a gaya

kis qadar khush the ham apna rahnuma kah kar tujhe

tere hote teri duniya mein ye bedad-o-sitam

log pachhtane lage apna khuda kah kar tujhe

ik zamana ham se ghussa hai ye ham ne kya kiya

sab ko chhota kar diya sab se bara kah kar tujhe

sari duniya se adawat mol le li muft mein

ham ne apna dost apna ham nawa kah kar tujhe

ah ye apna safina aur girdab-e-bala

sakht sharminda hue ham nakhuda kah kar tujhe

kis tarah ye ham wafadaron se dekha jaega

log mahfil mein pukaren be wafa kah kar tujhe

aur bhi un ki nigahon mein mohazzab ho gaya

kya mila sarshar dil ka majra kah kar tujhe