تھم گئے اشک بھی برسے ہوئے بادل کی طرح

تھم گئے اشک بھی برسے ہوئے بادل کی طرح

دل کی بیتابی وہی آج بھی ہے کل کی طرح

میں بھی ہوں اشک فشاں آپ اکیلے ہی نہیں

میرا دامن بھی ہے نم آپ کے آنچل کی طرح

جام و ساغر ہی پہ موقوف نہیں ہے ساقی

ہم بھی گردش میں ہیں اک دور مسلسل کی طرح

انتظار شب وعدہ کی نہ پوچھو روداد

رات آنکھوں میں کٹی ہے کسی بیکل کی طرح

کسی امید کا مسکن نہ تمنا کا محل

دل کی ویرانی ہے سنسان سے جنگل کی طرح

آپ جل جائے مگر اوروں کو محظوظ کرے

زندگی تم بھی گزارو یوں ہی صندل کی طرح

تیرے جلنے سے اگر تیرگی کم ہو اے دل

تو بھی جل جا کسی جلتی ہوئی مشعل کی طرح

لاشیں بکھری ہیں تمناؤں کی ارمانوں کی

قلب کا گنج شہیداں بھی ہے مقتل کی طرح

tham gae ashk bhi barse hue badal ki tarah

dil ki betabi wahi aj bhi hai kal ki tarah

main bhi hun ashk fishan ap akele hi nahin

mera daman bhi hai nam ap ke anchal ki tarah

jam-o-saghar hi pe mauquf nahin hai saqi

ham bhi gardish mein hain ik dur musalsal ki tarah

intizar-e-shab-e-waada ki na puchho rudad

rat ankhon mein kati hai kisi bekal ki tarah

kisi ummid ka maskan na tamanna ka mahal

dil ki wirani hai sunsan se jangal ki tarah

ap jal jae magar auron ko mahzuz kare

zindagi tum bhi guzaro yun hi sandal ki tarah

tere jalne se agar tirgi kam ho ai dil

tu bhi jal ja kisi jalti hui mashal ki tarah

lashen bikhri hain tamannaon ki armanon ki

qalb ka ganj-e-shahidan bhi hai maqtal ki tarah