احباب میرے درد سے کچھ بے خبر نہ تھے

احباب میرے درد سے کچھ بے خبر نہ تھے

یہ اور بات ہے وہ کوئی چارہ گر نہ تھے

طاقت تھی جب بدن میں تو دروازہ بند تھا

جب در کھلا قفس کا مرے بال و پر نہ تھے

انجان ہم تھے راہ سے منزل بھی دور تھی

اچھا ہوا کہ آپ شریک سفر نہ تھے

اس واسطے بھی مجھ کو ترا غم عزیز ہے

جتنے بھی غم ملے وہ غم معتبر نہ تھے

تاریک رات کا تھا سفر راہ پر خطر

روشن کہیں چراغ سر رہ گزر نہ تھے

وہ دن بھی کیا تھے دل میں تمنا نہ تھی کوئی

تکمیل آرزو کے لئے در بدر نہ تھے

سیلاب و زلزلے میں ہوئے کتنے گھر تباہ

وہ لوگ بے نیاز رہے جن کے گھر نہ تھے

کچھ لوگ مل گئے تھے یوں ہی راہ میں مجھے

جو میرے ساتھ ساتھ تھے وہ ہم سفر نہ تھے

سب نے مرا کلام پڑھا لیکن اے سعیدؔ

جو میرے ناقدین تھے وہ دیدہ ور نہ تھے

ahbab mere dard se kuchh be khabar na the

ye aur bat hai wo koi chara gar na the

taqat thi jab badan mein to darwaza band tha

jab dar khula qafas ka mire bal-o-par na the

anjan ham the rah se manzil bhi dur thi

achchha hua ke ap sharik-e-safar na the

is waste bhi mujh ko tira gham aziz hai

jitne bhi gham mile wo gham-e-motabar na the

tarik rat ka tha safar rah pur khatar

raushan kahin charagh-e-sar-e-rah guzar na the

wo din bhi kya the dil mein tamanna na thi koi

takmil-e-arzu ke liye dar badar na the

sailab-o-zalzale mein hue kitne ghar tabah

wo log be niyaz rahe jin ke ghar na the

kuchh log mil gae the yun hi rah mein mujhe

jo mere sath sath the wo ham safar na the

sab ne mira kalam parha lekin ai said

jo mere naqidin the wo dida war na the