تیور تمہارے دیکھ کر آدھا سخن کروں

تیور تمہارے دیکھ کر آدھا سخن کروں

ورنہ میں چاہتا ہوں زیادہ سخن کروں

مجھ کو مری غزل کا چمکنا پسند ہے

پورا کروں یہ نیک ارادہ سخن کروں

خاموشی دب نہ جائے معانی کے بوجھ سے

آہستہ اس کی پشت پہ لادا سخن کروں

یہ کم نمو چراغ مجھے دیکھتے رہیں

جب باد تند سے سر جادہ سخن کروں

جو بات میرے دل میں ہے سب کو پتا چلے

اکثر یہ سوچتا ہوں کہ سادہ سخن کروں

میرا کمال یہ ہے بساط کمال پر

شاہوں کے روبرو میں پیادہ سخن کروں

میں اک قدیم متن کی صورت لکھا ہوا

پہنوں حروف نو کا لبادہ سخن کروں

یہ شاعری ہے کوئی تجارت نہیں جناب

تف ہے اگر برائے افادہ سخن کروں

یاورؔ میں کوئی شاعر کم حوصلہ نہیں

جو دیکھ کر زمین کشادہ سخن کروں

tewar tumhare dekh kar adha sukhan karun

warna main chahta hun ziyada sukhan karun

mujh ko miri ghazal ka chamakna pasand hai

pura karun ye nek irada sukhan karun

khamoshi dab na jae maani ke bojh se

ahista us ki pusht pe lada sukhan karun

ye kam numu charagh mujhe dekhte rahen

jab bad-e-tund se sar-e-jada sukhan karun

jo bat mere dil mein hai sab ko pata chale

aksar ye sochta hun ke sada sukhan karun

mera kamal ye hai bisat-e-kamal par

shahon ke rubaru mein piyada sukhan karun

main ik qadim matn ki surat likha hua

pahnun huruf nau ka labada sukhan karun

ye shayari hai koi tijarat nahin janab

taf hai agar bara-e-ifada sukhan karun

yawar mein koi shayar kam hausla nahin

jo dekh kar zamin-e-kushada sukhan karun