اسے پسند ہیں جو روز و شب تماشے ہیں

اسے پسند ہیں جو روز و شب تماشے ہیں

تماشبین کی دنیا ہی اب تماشے ہیں

ہماری قوم کو جب سے ملی ہے آزادی

ہمارے ملک میں جاری عجب تماشے ہیں

تجھے طریقت عشاق کی خبر ہی نہیں

تری نگاہ میں وہ چشم و لب تماشے ہیں

تماشا دیکھنے والوں پہ سحر طاری ہے

تماشا دیکھنے والے بھی اب تماشے ہیں

بہت سی آنکھوں کو اس بات کی بھنک ہی نہیں

ادھر ادھر جو تماشا طلب تماشے ہیں

وہ شکل جب نہ رہی زندگی کے میلے میں

فضول میری نگاہوں میں سب تماشے ہیں

دل و نگاہ پہ اک بوجھ بن چکے یاورؔ

جو ان دنوں سر شہر ادب تماشے ہیں

use pasand hain jo roz-o-shab tamashe hain

tamashbain ki duniya hi ab tamashe hain

hamari qaum ko jab se mili hai azadi

hamare mulk mein jari ajab tamashe hain

tujhe tariqat ushshaq ki khabar hi nahin

tiri nigah mein wo chashm-o-lab tamashe hain

tamasha dekhne walon pe sahar tari hai

tamasha dekhne wale bhi ab tamashe hain

bahut si ankhon ko is bat ki bhanak hi nahin

idhar idhar jo tamasha talab tamashe hain

wo shakl jab na rahi zindagi ke mele mein

fuzul meri nigahon mein sab tamashe hain

dil-o-nigah pe ik bojh ban chuke yawar

jo in dinon sar-e-shahr-e-adab tamashe hain