میں رفعتوں کی انوکھی مثال ہونے لگا

میں رفعتوں کی انوکھی مثال ہونے لگا

یہ آسماں مرے کاندھوں کی شال ہونے لگا

فضائیں گیتوں کی فرقت میں بانجھ ہونے لگیں

شجر گرے تو پرندوں کا کال ہونے لگا

گھڑی گھڑی نئی باتوں کی کھوج ہونے لگی

ہمارا عہد مجسم سوال ہونے لگا

ورائے جسم جو کچھ فاصلے تھے مٹنے لگے

دل اس ادا سے شریک وصال ہونے لگا

نظر کے چاروں طرف رتجگوں کی باڑھ لگی

کسی سے خواب میں ملنا محال ہونے لگا

میں چاہتا تھا کہ دنیا کو تیرے جیسا لگوں

سو تیرے قول و عمل کی مثال ہونے لگا

زمانے بھر کے دکھوں سے رہائی ملنے لگی

تری نظر کا کوئی یرغمال ہونے لگا

اسے ہماری کوئی بد دعا لگے نہ لگے

خود اس نظام کا چلنا محال ہونے لگا

جو اہل حرف تھے کم کم ہی رہ گئے یاورؔ

ہمارے شہر میں قحط‌ الرجال ہونے لگا

main rifaton ki anokhi misal hone laga

ye asman mire kandhon ki shal hone laga

fazaen giton ki furqat mein banjh hone lagen

shajar gire to parindon ka kal hone laga

ghari ghari nai baton ki khoj hone lagi

hamara ahd-e-mujassam sawal hone laga

warae jism jo kuchh fasle the mitne lage

dil is ada se sharik-e-wisal hone laga

nazar ke charon taraf ratjagon ki barh lagi

kisi se khwab mein milna muhal hone laga

main chahta tha ke duniya ko tere jaisa lagun

so tere qaul-o-amal ki misal hone laga

zamane bhar ke dukhon se rihai milne lagi

tiri nazar ka koi yarghamal hone laga

use hamari koi bad dua lage na lage

khud is nizam ka chalna muhal hone laga

jo ahl-e-harf the kam kam hi rah gae yawar

hamare shahr mein qaht alrrijal hone laga