مرے کاغذ پہ ہیں لفظوں کے تابندہ ستارے

مرے کاغذ پہ ہیں لفظوں کے تابندہ ستارے

زمین شعر سے نکلے درخشندہ ستارے

بساط رفتگان فن لپیٹی جا چکی ہے

سر چرخ ہنر موجود ہیں زندہ ستارے

مقدر کی لکیریں کھینچنے والا خدا ہے

نہیں ہوتے مقدر کے نویسندہ ستارے

ندامت کے سبب کیا منہ دکھائیں گے سحر کو

کہ ہیں جرم تنک تابی پہ شرمندہ ستارے

نہ ہوں گے بیعت شب کے لیے تیار ہرگز

وہ موجودہ ستارے ہوں کہ آئندہ ستارے

فصیل وقت پر کندہ رہے گا نام اپنا

کہ ہم ہیں عہد حاضر کے نمائندہ ستارے

زمیں کے گوشے گوشے پر نظر رکھتے ہیں یاورؔ

جمال صبح فردا کے ہیں جوئندہ ستارے

mire kaghaz pe hain lafzon ke tabinda sitare

zamin-e-sher se nikle darakhshinda sitare

bisat-e-raftagan-e-fan lapeti ja chuki hai

sar-e-charkh-e-hunar maujud hain zinda sitare

muqaddar ki lakiren khinchne wala khuda hai

nahin hote muqaddar ke nawisnda sitare

nadamat ke sabab kya munh dikhaenge sahar ko

ke hain jurm-e-tunuk tabi pe sharminda sitare

na honge baiat-e-shab ke liye tayyar hargiz

wo maujuda sitare hun ke ainda sitare

fasil-e-waqt par kanda rahega nam apna

ke ham hain ahd-e-hazir ke numainda sitare

zamin ke goshe goshe par nazar rakhte hain yawar

jamal-e-subh-e-farda ke hain joinda sitare