فضائے شہر کو وحشت اثر تسلیم کرتے ہیں

فضائے شہر کو وحشت اثر تسلیم کرتے ہیں

دلوں میں چھپ کے بیٹھا ہے جو ڈر تسلیم کرتے ہیں

ہمارے گھر کی تنہائی پہ پورا حق ہمارا ہے

اسے ہم اپنے آنگن کا شجر تسلیم کرتے ہیں

جو سچ پوچھو تو اب وہ شے نہیں اپنے ٹھکانے پر

یہ ہم ہیں جو اسے اب تک ادھر تسلیم کرتے ہیں

مری شوریدگی مجھ کو کہیں تھمنے نہیں دیتی

بھنور مجھ کو بذات خود بھنور تسلیم کرتے ہیں

ہماری ذات سے سنجیدگی کا خول اترا ہے

یہ تیری دل نوازی کا اثر تسلیم کرتے ہیں

ہم ان مہتاب چہروں کے جلو میں گھومنے والے

تری یادوں کو اپنا ہم سفر تسلیم کرتے ہیں

وبا جو شہر میں پھیلی ہے وہ رکنے نہیں والی

سمجھتے ہیں ہمارے چارہ گر تسلیم کرتے ہیں

کسی انسان سے اپنی طبیعت مل نہیں سکتی

سب اپنے آپ کو فرخ سیر تسلیم کرتے ہیں

تری قدرت کے آگے بس نہیں چلتا کسی شے کا

ترے بندے ترے محتاج در تسلیم کرتے ہیں

عجب ذوق نظارہ دیدۂ پرنم نے بخشا ہے

ضیائے اشک کو آب گہر تسلیم کرتے ہیں

میں اپنی شاعری سے مطمئن ہوتا نہیں یاورؔ

اگرچہ مجھ کو سب اہل ہنر تسلیم کرتے ہیں

faza-e-shahr ko wahshat asar taslim karte hain

dilon mein chhup ke baitha hai jo dar taslim karte hain

hamare ghar ki tanhai pe pura haq hamara hai

use ham apne angan ka shajar taslim karte hain

jo sach puchho to ab wo shai nahin apne thikane par

ye ham hain jo use ab tak idhar taslim karte hain

miri shoridagi mujh ko kahin thamne nahin deti

bhanwar mujh ko bazat-e-khud bhanwar taslim karte hain

hamari zat se sanjidagi ka khol utra hai

ye teri dil nawazi ka asar taslim karte hain

ham un mahtab chehron ke jilau mein ghumne wale

tiri yadon ko apna ham safar taslim karte hain

waba jo shahr mein phaili hai wo rukne nahin wali

samajhte hain hamare chara gar taslim karte hain

kisi insan se apni tabiat mil nahin sakti

sab apne ap ko farrukh sair-e-taslim karte hain

tiri qudrat ke age bas nahin chalta kisi shai ka

tire bande tire mohtaj dar taslim karte hain

ajab zauq-e-nazara dida-e-purnam ne bakhsha hai

ziya-e-ashk ko ab-e-guhar taslim karte hain

main apni shayari se mutmain hota nahin yawar

agarche mujh ko sab ahl-e-hunar taslim karte hain