بنا لیتا میں تجھ کو ہم سفر کچھ سال پہلے تک

بنا لیتا میں تجھ کو ہم سفر کچھ سال پہلے تک

مگر اس بات سے لگتا تھا ڈر کچھ سال پہلے تک

مجھے فکر معیشت تھی تجھے خوف جدائی تھا

الگ تھے زاویہ ہائے نظر کچھ سال پہلے تک

میں ناداں تھا اسے اپنے تصرف میں نہیں لایا

بہت نزدیک تھی شاخ ثمر کچھ سال پہلے تک

تری درویش آنکھوں کا ارادت مند بن جاتا

تو مجھ کو مل گئی ہوتی اگر کچھ سال پہلے تک

انہیں چن چن کے تیرے عشق کا ایندھن بنا دیتا

یہ ماہ و سال سالے تھے کدھر کچھ سال پہلے تک

ترے گالوں کے ڈمپل میں نگاہیں ڈوب جاتی تھیں

لہو میں رقص کرتے تھے بھنور کچھ سال پہلے تک

مجھے یاور عظیمؔ اب تک وہ آنکھیں یاد آتی ہیں

میں ان پلکوں کے تھا زیر اثر کچھ سال پہلے تک

bana leta main tujh ko ham safar kuchh sal pahle tak

magar is bat se lagta tha dar kuchh sal pahle tak

mujhe fikr-e-maishat thi tujhe khauf-e-judai tha

alag the zawiya ha-e-nazar kuchh sal pahle tak

main nadan tha use apne tasarruf mein nahin laya

bahut nazdik thi shakh-e-samar kuchh sal pahle tak

tiri darwesh ankhon ka iradat mand ban jata

tu mujh ko mil gai hoti agar kuchh sal pahle tak

unhen chun chun ke tere ishq ka indhan bana deta

ye mah-o-sal sale the kidhar kuchh sal pahle tak

tire galon ke dampal mein nigahen dub jati thin

lahu mein raqs karte the bhanwar kuchh sal pahle tak

mujhe yawar azim ab tak wo ankhen yad ati hain

main in palkon ke tha zer-e-asar kuchh sal pahle tak