جنس دل لے کر بھرے بازار تک پہنچا نہیں

جنس دل لے کر بھرے بازار تک پہنچا نہیں

ایک تک پہنچا ہوں میں دو چار تک پہنچا نہیں

میرے پہلو سے گریزاں ہے وہ میرا خوش بدن

اک ہرن ہے جو ابھی تاتار تک پہنچا نہیں

دیکھنے میں کچھ نہیں ہے وقت کی یہ آب جو

کوئی لیکن اس ندی کے پار تک پہنچا نہیں

کاغذوں پر ہم لکیریں کھینچتے ہی رہ گئے

سلسلہ حرف ابد آثار تک پہنچا نہیں

اس کو دشت زندگی میں کوئی منزل کب ملی

جو غزال وقت کی رفتار تک پہنچا نہیں

کچھ نہ کچھ واماندگاں کو دے پذیرائی کا حق

ٹھیک ہے کوئی ترے معیار تک پہنچا نہیں

تیرگی کی جونک نے سب پی لیا میرا لہو

کوئی سورج میرے زخم تار تک پہنچا نہیں

یار اس مفتوح لڑکی میں بلا کا حسن تھا

میں ہی بزدل تھا جو دل کی ہار تک پہنچا نہیں

شاعری کو یہ شرف مجھ سے ملا یاور عظیمؔ

میں غزل لے کر کبھی دربار تک پہنچا نہیں

jins-e-dil le kar bhare bazar tak pahuncha nahin

ek tak pahuncha hun main do char tak pahuncha nahin

mere pahlu se gurezan hai wo mera khush badan

ik hiran hai jo abhi tatar tak pahuncha nahin

dekhne mein kuchh nahin hai waqt ki ye ab ju

koi lekin is nadi ke par tak pahuncha nahin

kaghazon par ham lakiren khinchte hi rah gae

silsila harf-e-abad asar tak pahuncha nahin

us ko dasht-e-zindagi mein koi manzil kab mili

jo ghazal-e-waqt ki raftar tak pahuncha nahin

kuchh na kuchh wamandagan ko de pazirai ka haq

thik hai koi tire meyar tak pahuncha nahin

tirgi ki jonk ne sab pi liya mera lahu

koi suraj mere zakhm-e-tar tak pahuncha nahin

yar is maftuh larki mein bala ka husn tha

main hi buzdil tha jo dil ki har tak pahuncha nahin

shayari ko ye sharaf mujh se mila yawar azim

main ghazal le kar kabhi darbar tak pahuncha nahin