توقیر اندھیروں کی بڑھا دی گئی شاید

توقیر اندھیروں کی بڑھا دی گئی شاید

اک شمع جو روشن تھی بجھا دی گئی شاید

پھر در بدری ہونے لگی اس کا مقدر

پھر شوق کے شعلوں کو ہوا دی گئی شاید

موہوم نظر آتا ہے اب جوش ملاقات

کچھ گرمیٔ احساس گھٹا دی گئی شاید

اس بار بھی شعلوں نے مچا ڈالی تباہی

اس بار بھی شعلوں کو ہوا دی گئی شاید

ٹکتیں نہیں دنیائے حقیقت پہ نگاہیں

خوابوں کی کوئی بزم سجا دی گئی شاید

آ ٹھہری تھی جو ضبط کے اسرار سے بچ کر

آنکھوں سے وہی بوند گرا دی گئی شاید

قاتل کو بٹھایا گیا سر پر مرے ہوتے

مجھ کو میری اوقات بتا دی گئی شاید

tauqir andheron ki barha di gai shayad

ik shama jo raushan thi bujha di gai shayad

phir dar badri hone lagi us ka muqaddar

phir shauq ke sholon ko hua di gai shayad

mauhum nazar ata hai ab josh-e-mulaqat

kuchh garmi-e-ehsas ghata di gai shayad

is bar bhi sholon ne macha dali tabahi

is bar bhi sholon ko hua di gai shayad

tiktin nahin duniya-e-haqiqat pe nigahen

khwabon ki koi bazm saja di gai shayad

a thahri thi jo zabt ke asrar se bach kar

ankhon se wahi bund gira di gai shayad

qatil ko bithaya gaya sar par mire hote

mujh ko meri auqat bata di gai shayad