حادثوں کا سلسلہ منظر بہ منظر جم گیا

حادثوں کا سلسلہ منظر بہ منظر جم گیا

ہر کسی کے دھڑ پہ اک فرعون کا سر جم گیا

خاک کی کشتی تلے سونے کا ساغر جم گیا

دیدۂ بے خواب میں خواب سکندر جم گیا

موسموں کے بیچ کی دوری کا اندازہ لگاؤ

بہہ گئے پربت پگھل کر اور سمندر جم گیا

لڑکھڑا کر گر پڑی اونچی عمارت دفعتاً

دفعتاً تعمیر کی کرسی پہ کھنڈر جم گیا

رفعت چرخ بریں محدود ہو کر رہ گئی

جب سروں پر دھند کا سفاک لشکر جم گیا

دیدۂ گربہ سے کیا پھوٹی شعاع جاں گزا

پھڑپھڑایا تک نہیں زندہ کبوتر جم گیا

اہل دنیا سے مجھے تو کوئی اندیشہ نہ تھا

نام تیرا کس لئے میرے لبوں پر جم گیا

hadson ka silsila manzar ba manzar jam gaya

har kisi ke dhar pe ik firaun ka sar jam gaya

khak ki kashti tale sone ka saghar jam gaya

dida-e-be khwab mein khwab-e-sikandar jam gaya

mausamon ke bich ki duri ka andaza lagao

bah gae parbat pighal kar aur samundar jam gaya

larkhara kar gir pari unchi imarat dafatan

dafatan taamir ki kursi pe khandar jam gaya

rifat-e-charkh-e-barin mahdud ho kar rah gai

jab saron par dhund ka saffak lashkar jam gaya

dida-e-gurba se kya phuti shua-e-jan gaza

pharpharaya tak nahin zinda kabutar jam gaya

ahl-e-duniya se mujhe to koi andesha na tha

nam tera kis liye mere labon par jam gaya