Arooz is now on the App Store, for iPhone and iPad. Download →

All poetry

سرخ موسم کی کہانی ہے پرانی ہو نہ ہو

Ehteram Islam (b. 1949)

سرخ موسم کی کہانی ہے پرانی ہو نہ ہو

آسماں کا رنگ آگے آسمانی ہو نہ ہو

خواب میں مجھ کو نظر آتی ہیں بھیگی سیپیاں

آنکھ کھلنے پر تری آنکھوں میں پانی ہو نہ ہو

ساتھ ہوتی ہے مرے ہر گام پر سنجیدگی

ہو رہی ہے دور اب مجھ سے جوانی ہو نہ ہو

ہر جگہ نکلے گی تیری بات مجھ کو دیکھ کر

تذکرہ تیرا کہیں میری زبانی ہو نہ ہو

روشنی دیتے رہیں گے مجھ کو زخموں کے چراغ

اب اندھیرے میں کہیں سے ضو فشانی ہو نہ ہو

اک طرف میری انا ہے اک طرف تیری خوشی

آ گیا میرے لیے پل امتحانی ہو نہ ہو

زہر کا پانی میں ہونا طے شدہ ہے احترامؔ

آگہی کے گھاٹ پر دریا میں پانی ہو نہ ہو