منہ اندھیرے چمنستان کا پیکر لے کر

منہ اندھیرے چمنستان کا پیکر لے کر

کون گزرا ہے دبے پاؤں گل تر لے کر

مجھ کو شاہی میں فقیری کا مزا آتا ہے

کیا کروں گا میں سکندر کا مقدر لے کر

کون آیا ہے بیاباں میں کہ سناٹا ہے

اپنی آنکھوں میں چمن زار کا منظر لے کر

تیرے کوچے میں بصد شوق لٹا آیا ہوں

اپنا سرمایۂ دل تیرے برابر لے کر

کوچۂ شہر نگاراں میں پھرا ہے برسوں

شوق آوارہ مزاجی مجھے در در لے کر

ہم نے جگنو کو اندھیروں میں بھٹکتے دیکھا

اپنی مٹھی میں اجالوں کا مقدر لے کر

قدر محنت نہ ہوئی سارے زمانے میں لئیقؔ

لوٹ آیا میں خیالات کے جوہر لے کر

munh andhere chamanistan ka paikar le kar

kaun guzra hai dabe paon gul-e-tar le kar

mujh ko shahi mein faqiri ka maza ata hai

kya karunga mein sikandar ka muqaddar le kar

kaun aya hai bayaban mein ke sannata hai

apni ankhon mein chaman zar ka manzar le kar

tere kuche mein basad shauq luta aya hun

apna sarmaya-e-dil tere barabar le kar

kucha-e-shahr-e-nigaran mein phira hai barson

shauq awara mizaji mujhe dar dar le kar

ham ne jugnu ko andheron mein bhatakte dekha

apni mutthi mein ujalon ka muqaddar le kar

qadr mehnat na hui sare zamane mein laiq

laut aya main khayalat ke jauhar le kar