کس کس کی یاد دل کو ستاتی ہے کیا کہیں

کس کس کی یاد دل کو ستاتی ہے کیا کہیں

تنہائی کیا کیا بزم سجاتی ہے کیا کہیں

وہ اک نگاہ جب بھی گزرتے ہیں راہ سے

اصرار کر کے ہم کو بلاتی ہے کیا کہیں

باریک لب پہ اس کے تبسم کی اک کرن

فتنے جو سو رہے ہیں جگاتی ہے کیا کہیں

پہنے ہوئے کھڑی ہے چراغوں کا پیرہن

اب تیرگی بھی جسم چھپاتی ہے کیا کہیں

دنیا کی کچھ خطا ہے نہ پروازؔ موت کی

یہ زندگی ہی ہم کو مٹاتی ہے کیا کہیں

kis kis ki yad dil ko satati hai kya kahen

tanhai kya kya bazm sajati hai kya kahen

wo ik nigah jab bhi guzarte hain rah se

israr kar ke ham ko bulati hai kya kahen

barik lab pe us ke tabassum ki ik kiran

fitne jo so rahe hain jagati hai kya kahen

pahne hue khari hai charaghon ka pairahan

ab tirgi bhi jism chhupati hai kya kahen

duniya ki kuchh khata hai na parwaz maut ki

ye zindagi hi ham ko mitati hai kya kahen