دن ملے رات ملے صبح ملے شام ملے

دن ملے رات ملے صبح ملے شام ملے

عشق صادق ہو تو تکلیف میں آرام ملے

دو کنارے کبھی دریا کے نہ مل پائیں گے

کیسے پھر زیست کے آغاز سے انجام ملے

زندگی درد محبت سے سجا رکھی ہے

گھٹ کے مر جاؤں جو دل کو مرے آرام ملے

نظم میخانے کا قائم ہے انہیں سے ساقی

تیرے خم خانے میں جو لوگ تہی جام ملے

سب ہیں بیتاب تری ایک نظر کی خاطر

دیکھیے کس کو محبت میں یہ انعام ملے

میں محبت میں ترے نام سے آگے نہ بڑھا

مجھ کو اس راہ میں ہر چند کئی نام ملے

دشمنوں سے تو کسی جرم کی پائی نہ سند

دوستوں سے مجھے الزام ہی الزام ملے

درد کو اس لئے سینے سے لگا رکھا ہے

حد سے بڑھ جائے تو کچھ جسم کو آرام ملے

اپنی تقدیر پہ وہ ناز کرے کیوں نہ لئیقؔ

جس کو دنیا نہ ملے آپ کا پیغام ملے

din mile rat mile subh mile sham mile

ishq-e-sadiq ho to taklif mein aram mile

do kinare kabhi dariya ke na mil paenge

kaise phir zist ke aghaz se anjam mile

zindagi dard-e-mohabbat se saja rakhi hai

ghut ke mar jaun jo dil ko mire aram mile

nazm maikhane ka qaim hai unhen se saqi

tere kham khane mein jo log tahi jam mile

sab hain betab tiri ek nazar ki khatir

dekhiye kis ko mohabbat mein ye inam mile

main mohabbat mein tire nam se age na barha

mujh ko is rah mein har chand kai nam mile

dushmanon se to kisi jurm ki pai na sanad

doston se mujhe ilzam hi ilzam mile

dard ko is liye sine se laga rakha hai

had se barh jae to kuchh jism ko aram mile

apni taqdir pe wo naz kare kyun na laiq

jis ko duniya na mile ap ka paigham mile