وہی کچھ زندگی میں زندگی کا بھید پاتے ہیں

وہی کچھ زندگی میں زندگی کا بھید پاتے ہیں

جو پیہم جستجو کرتے ہیں برسوں غم اٹھاتے ہیں

جو سچ پوچھو تو خود جیتے ہیں اور جینا سکھاتے ہیں

وہ دیوانے جو ہر طوفان غم میں مسکراتے ہیں

کچھ اس انداز سے وہ اپنی محفل میں بلاتے ہیں

کہ انساں کے قدم اٹھنے سے پہلے کانپ جاتے ہیں

وہ پچھلی شب کو اپنے رخ سے جب پردا اٹھاتے ہیں

مرا احساس شاہد ہے دو عالم جھوم جاتے ہیں

تعجب کیوں ہے میری بے خودی پر اہل محشر کو

وہ جس کو بھی پلاتے ہیں کچھ ایسی ہی پلاتے ہیں

نہیں کچھ خاک دل لیکن پہنچ کر ان کے دامن تک

یہی ذرے مہ و خورشید بن کر جگمگاتے ہیں

محبت ابتدا تا انتہا عرفان کامل ہے

مگر ہم تو انہیں پانے سے پہلے کھوئے جاتے ہیں

ترا کوچہ ہی کیوں رہ رہ کے پیہم یاد آتا ہے

اسی عالم میں عالم اور بھی تو پائے جاتے ہیں

شکایت کر رہے ہو کیفؔ تم کو شکر لازم ہے

وہ مشکل سے کسی کو اپنا دیوانہ بناتے ہیں

wahi kuchh zindagi mein zindagi ka bhed pate hain

jo paiham justuju karte hain barson gham uthate hain

jo sach puchho to khud jite hain aur jina sikhate hain

wo diwane jo har tufan-e-gham mein muskurate hain

kuchh is andaz se wo apni mahfil mein bulate hain

ke insan ke qadam uthne se pahle kanp jate hain

wo pichhli shab ko apne rukh se jab parda uthate hain

mira ehsas-e-shahid hai do alam jhum jate hain

taajjub kyun hai meri be khudi par ahl mahshar ko

wo jis ko bhi pilate hain kuchh aisi hi pilate hain

nahin kuchh khak dil lekin pahunch kar un ke daman tak

yahi zarre mah-o-khurshid ban kar jagmagate hain

mohabbat ibtida ta intiha irfan-e-kamil hai

magar ham to unhen pane se pahle khoe jate hain

tira kucha hi kyun rah rah ke paiham yad ata hai

isi alam mein alam aur bhi to pae jate hain

shikayat kar rahe ho kaif tum ko shukr lazim hai

wo mushkil se kisi ko apna diwana banate hain