جنون شوق کا حاصل نہ تم سمجھے نہ ہم سمجھے

جنون شوق کا حاصل نہ تم سمجھے نہ ہم سمجھے

کہاں دونوں کی ہے منزل نہ تم سمجھے نہ ہم سمجھے

ڈبونا چاہتی تھیں جو بھی ہم دونوں کی کشتی کو

انہیں موجوں میں تھا ساحل نہ تم سمجھے نہ ہم سمجھے

تمناؤں کے طوفانوں نے فرصت ہی نہ ملنے دی

مقامات نگاہ و دل نہ تم سمجھے نہ ہم سمجھے

محبت نے کچھ ایسا حوصلہ بخشا تھا دونوں کو

کسی مشکل کو بھی مشکل نہ تم سمجھے نہ ہم سمجھے

شدید احساس قربت سے جہاں مدہوش تھے ہم تم

وہیں تھا امتحان دل نہ تم سمجھے نہ ہم سمجھے

محبت صرف اظہار محبت کو نہیں کہتے

فریب سعیٔ لا حاصل نہ تم سمجھے نہ ہم سمجھے

وفا کا عہد کیسی سادگی کے ساتھ کر بیٹھے

وفا ہے کس قدر مشکل نہ تم سمجھے نہ ہم سمجھے

سبھی بیگانہ تھے ظاہر میں ہم دونوں کی حالت سے

مگر کوئی نہ تھا غافل نہ تم سمجھے نہ ہم سمجھے

وہ کہتے ہیں ہمیں بھی کیفؔ رسوا کر دیا تم نے

مگر رسوائی کا حاصل نہ تم سمجھے نہ ہم سمجھے

junun-e-shauq ka hasil na tum samjhe na ham samjhe

kahan donon ki hai manzil na tum samjhe na ham samjhe

dubona chahti thin jo bhi ham donon ki kashti ko

unhen maujon mein tha sahil na tum samjhe na ham samjhe

tamannaon ke tufanon ne fursat hi na milne di

maqamat-e-nigah-o-dil na tum samjhe na ham samjhe

mohabbat ne kuchh aisa hausla bakhsha tha donon ko

kisi mushkil ko bhi mushkil na tum samjhe na ham samjhe

shadid ehsas-e-qurbat se jahan madhosh the ham tum

wahin tha imtihan-e-dil na tum samjhe na ham samjhe

mohabbat sirf-e-izhar-e-mohabbat ko nahin kahte

fareb-e-sai-e-la hasil na tum samjhe na ham samjhe

wafa ka ahd kaisi sadgi ke sath kar baithe

wafa hai kis qadar mushkil na tum samjhe na ham samjhe

sabhi begana the zahir mein ham donon ki halat se

magar koi na tha ghafil na tum samjhe na ham samjhe

wo kahte hain hamen bhi kaif-e-ruswa kar diya tum ne

magar ruswai ka hasil na tum samjhe na ham samjhe