نظر نظر سے ملائی کیوں تھی نفس نفس میں سمائے کیوں تھے

نظر نظر سے ملائی کیوں تھی نفس نفس میں سمائے کیوں تھے

انہیں تھا منظور مجھ سے پردہ تو سامنے میرے آئے کیوں تھے

دیار حسن وفا طلب کی طرف قدم ہی اٹھائے کیوں تھے

جنوں کو الزام دینے والے جنوں کی باتوں میں آئے کیوں تھے

اسی خطا کی سزا میں اب تک نشان منزل نہیں ملا ہے

رہ محبت میں اول اول مرے قدم ڈگمگائے کیوں تھے

وہ آفتاب جمال شاید یہیں کہیں سے گزر رہا ہے

جہان دل کے تمام ذرے ابھی ابھی جگمگائے کیوں تھے

نفس نفس صد خلش بد اعمال قدم قدم پر ہزار طوفاں

میں اب یہ سمجھا کہ روز اول وہ دیکھ کر مسکرائے کیوں تھے

انہیں جو اب کیفؔ سے ہے شکوہ کہ نظم عالم بگاڑ ڈالا

وہ ایسے دیوانے کو بھلا اس خرد کی دنیا میں لائے کیوں تھے

nazar nazar se milai kyun thi nafas nafas mein samae kyun the

unhen tha manzur mujh se parda to samne mere ae kyun the

dayar-e-husn-e-wafa talab ki taraf qadam hi uthae kyun the

junun ko ilzam dene wale junun ki baton mein ae kyun the

isi khata ki saza mein ab tak nishan-e-manzil nahin mila hai

rah-e-mohabbat mein ol awwal mire qadam dagmagae kyun the

wo aftab-e-jamal shayad yahin kahin se guzar raha hai

jahan-e-dil ke tamam zarre abhi abhi jagmagae kyun the

nafas nafas sad khalish bad aamal qadam qadam par hazar tufan

main ab ye samjha ke roz-e-awwal wo dekh kar muskurae kyun the

unhen jo ab kaif se hai shikwa ke nazm-e-alam bigar dala

wo aise diwane ko bhala is khirad ki duniya mein lae kyun the