زندگی ناز کرے جس پہ وہ پہچان بنے

زندگی ناز کرے جس پہ وہ پہچان بنے

دیکھیے آج کا انسان کب انسان بنے

ایک افسانہ محبت کا لکھا تھا ہم نے

اور دنیا کے لئے سیکڑوں عنوان بنے

صبر اور شکر کی منزل سے وہ گزرا ہی نہیں

جو پریشاں نہ ہوا اور پریشان بنے

کیا کہوں اس کے سوا اور محبت کیا ہے

دل کی رگ رگ میں سما کر وہ مری جان بنے

زندگی میں مری اک ایسا بھی وقت آیا ہے

جاننے والے مجھے دیکھ کے انجان بنے

عشق میں خانۂ دل دونوں کے ویران رہے

مجھ کو مہمان بنایا نہ وہ مہمان بنے

چند کانٹوں کے سوا شاخوں میں رکھا کیا ہے

کون ایسے میں گلستاں کا نگہبان بنے

مل گیا جہد مسلسل کا صلہ مجھ کو لئیقؔ

کل کے غم آج مرے عیش کا سامان بنے

zindagi naz kare jis pe wo pahchan bane

dekhiye aj ka insan kab insan bane

ek afsana mohabbat ka likha tha ham ne

aur duniya ke liye saikron unwan bane

sabr aur shukr ki manzil se wo guzra hi nahin

jo pareshan na hua aur pareshan bane

kya kahun us ke siwa aur mohabbat kya hai

dil ki rag rag mein sama kar wo miri jan bane

zindagi mein miri ik aisa bhi waqt aya hai

janne wale mujhe dekh ke anjan bane

ishq mein khana-e-dil donon ke wiran rahe

mujh ko mehman banaya na wo mehman bane

chand kanton ke siwa shakhon mein rakha kya hai

kaun aise mein gulistan ka nigahban bane

mil gaya jahd-e-musalsal ka sila mujh ko laiq

kal ke gham aj mire aish ka saman bane