زندگی کو اک کہانی دے گیا

زندگی کو اک کہانی دے گیا

ہم سفر اپنی نشانی دے گیا

ابر رویا آنسوؤں سے اس قدر

سوکھے دریا کو بھی پانی دے گیا

رکھ گیا ویرانیٔ گلشن کو پاس

اور مجھ کو باغبانی دے گیا

جاگتی آنکھوں میں رکھ کر خواب سا

زندگانی کو روانی دے گیا

بوڑھا برگد پی گیا سورج کی آگ

دھوپ کیسی سائبانی دے گیا

اپنے بچوں کی شرارت سے لگا

میرا بچپن دور ثانی دے گیا

اب ظفرؔ بس ایک موسم یاد ہے

پیار کی جو اک نشانی دے گیا

zindagi ko ik kahani de gaya

ham safar apni nishani de gaya

abr roya ansuon se is qadar

sukhe dariya ko bhi pani de gaya

rakh gaya wirani-e-gulshan ko pas

aur mujh ko baghbani de gaya

jagti ankhon mein rakh kar khwab sa

zindagani ko rawani de gaya

burha bargad pi gaya suraj ki ag

dhup kaisi saibani de gaya

apne bachchon ki shararat se laga

mera bachpan daur-e-sani de gaya

ab zafar bas ek mausam yad hai

pyar ki jo ik nishani de gaya